【官宣】熱刺終炒干地　新帥決定惹不滿

足球博彩神器，每日重心提供盡在《彩報》：http://win.on.cc/football/　

熱刺周一(27日)官方宣布，同意大利領隊干地達成解約協議，令人意外嘅係干地助手史泰連尼將會留低，並且出任看守領隊至今個球季完結，意味熱刺球迷心儀嘅拿高斯文唔會即刻過檔，未來點樣發展仍然係個問號。

干地上星期公開怒插球員後，熱刺拖到周一終於郁手，官方聲明證實干地已經離職，主席利維亦表示：「我哋仲有10場聯賽，要為歐聯席位而戰，所有人要齊心確保拎到最高嘅排名。」雖然干地被炒，不過佢嘅多年心腹史泰連尼仍然留任，而且仲會出任看守領隊至季尾，傳聞會暫掌帥印嘅賴恩美臣就會做佢副手。

熱刺呢個決定就令唔少球迷不滿，因為普遍球迷希望干地被炒後，可以盡早招攬市場上未有班落嘅名帥，包括拿高斯文、普捷天奴等等，但熱刺宣布史泰連尼會執教到季尾，意味物色新帥計劃會拖到夏天先進行，到時面對嘅競爭可能會更大。