邁治蘭又神救！法國1比0險勝愛爾蘭

足球博彩神器，每日重心提供盡在《彩報》：http://win.on.cc/football/　

周二(28日)凌晨歐國外B組賽事，法國作客只能夠1比0小勝愛爾蘭，今場法國贏得頗為驚險，若非門將邁治蘭尾段貢獻神救，未必可以錄得2連勝。世盃後榮升1號門將嘅邁治蘭賽後獲領隊迪甘斯大讚，奠定國家隊正選位置。

法國今場繼續由隊長基利安麥巴比領軍，不過面對愛爾蘭硬淨打法，法國控球時間長都冇乜入肉埋門，直到50分鐘先由班捷文柏華特前場截擊，立即禁區外轟入世界波。愛爾蘭尾段角球攻勢威脅極大，邁治蘭完場前飛身救出尼敦哥連斯嘅必入頭槌，成為法國贏波功臣。

洛里斯喺世盃後宣布退役，效力AC米蘭嘅邁治蘭就成為法國1號，迪甘斯賽後表示：「邁治蘭就係邁治蘭！要繼承洛里斯嘅位置唔容易，佢喺國家隊已經一段時間，呢2場波邁治蘭已經證明自己能力。」邁治蘭上場對荷蘭救出12碼，今仗又有關鍵撲救，正選位置相當穩陣。