魔迷獻計:麥湯米尼代替韋格賀斯踢前鋒

2023年03月29日 10:02
東網電視
更多新聞短片
(Getty Images)
足球博彩神器,每日重心提供盡在《彩報》:http://win.on.cc/football/ 
麥湯米尼近2場歐國盃外圍賽突然變身射手,合共轟入4球,同葡萄牙嘅前紅魔鬼隊友C朗睇齊,曼聯球迷見到呢位以往甚少入波嘅防守中場「鐵樹開花」,忽發奇想紛紛喺網上向紅魔鬼領隊坦哈格獻計,認為可以用麥湯米尼取代長期啞火嘅韋格賀斯,擔任正選前鋒,隨時有妙不可言嘅效果。
魔迷將兩人作出比較,佢哋同樣身材高大,麥湯米尼身高1米93,韋格賀斯有1米97,由於「麥湯」本身司職防守中場,擅於搶截,同「搶逼狂人」韋格賀斯一樣可以喺前場壓逼對手。
講到入球能力,兩人今季同樣為曼聯入咗2球,但麥湯米尼近期腳風順好多,近2場歐國外已有4球進帳,反觀韋格賀斯近2場歐國外為荷蘭上陣都食白果,最離譜係上仗對魚腩直布羅陀,荷蘭有50次攻門,韋格賀斯以正選踢足90分鐘,仍然冇波入,實在令人失望,難怪魔迷建議用麥湯米尼代替韋格賀斯踢前鋒。
不過,由於曼聯中場受到傷停問題影響,基斯甸艾歷臣、沙比薩有傷在身,卡斯米路停賽,坦哈格冇可能安排麥湯米尼踢前鋒,佢應該會同費特出任雙防中,出戰4月2日晚英超作客紐卡素。