美斯國際賽入波「100+」　南美史上第一人

最強博彩盤路過關神器《串績王》：http://win.on.cc/football/　

周三(29日)早上國際熱身賽，阿根廷主場以7比0大勝庫拉索，美斯射入3球及1次助攻，國家隊累積入波達到102球，成為史上首位國際賽入球破百嘅南美洲球員。

阿根廷上仗熱身賽贏巴拿馬2比0，美斯取得國家隊第99球，今仗遇上魚腩球隊庫拉索，成為佢刷數據最佳機會。呢位35歲球王亦唔客氣，上演帽子戲法，達成國家隊入球破百嘅壯舉，適逢比賽當日距離阿根廷奪得上年世界盃冠軍100日，美斯喺呢日入波達到100大關，別具意義。

美斯亦成為史上第3位國際賽入波達到100球或以上嘅球員，別外2位分別係葡萄牙球星C朗(122球)、伊朗名宿戴伊(109球)，所以美斯亦係首位國際賽入波「100+」南美洲球員，強如兩大已故傳奇球王比利、馬納當拿都望塵莫及。

今場除咗美斯入3球之外，尼高拉斯干沙利斯、安素費南迪斯、迪馬利亞、蒙迪爾亦各建一功，贈庫拉索7蛋。