巴塞大利好　迪比利復操可出戰皇馬

最強博彩盤路過關神器《串績王》：http://win.on.cc/football/　

巴塞隆拿官方社交網公布，養傷多時嘅翼鋒奧士文尼迪比利已經復操，身體狀態唔錯，如果一切順利，呢位法國國腳應該可以喺4月6日凌晨西班牙盃4強次回合上陣，主場迎戰皇馬。

奧士文尼迪比利雖然喺上年世界盃表現欠佳，但踢球會賽事有不俗發揮，今季為巴塞隆拿各項賽事上陣28場，射入8球及7次助攻，進攻效率非常高。

巴塞隆拿喺西甲已經領先皇馬12分，奪冠機會高唱入雲，球隊目標要贏埋西班牙盃冠軍，佢哋喺4強首回合以1比0擊敗皇馬，如果次回合有奧士文尼迪比利助陣，勢必如虎添翼，進一步提升晉級機會。