布卡約沙卡將續約5年　人工極瘋狂

最強博彩盤路過關神器《串績王》：http://win.on.cc/football/　

英國《每日郵報》爆料，指阿仙奴即將同翼鋒布卡約沙卡續約5年，呢位21歲英格蘭國腳可獲得大幅加薪，由現時7萬鎊周薪，增加至30萬鎊周薪，令佢成為兵工廠最高人工球員。

阿仙奴近期積極出手綁實主力，早前已經同翼鋒加比爾馬天尼利續約至2027年，亦同中堅威廉沙列巴、布卡約沙卡傾緊續約事宜。

其中布卡約沙卡已經同意續約5年，會方大破慳囊，開出30萬鎊周薪，令佢超越25萬鎊周薪嘅加比爾捷西斯，成為阿仙奴「打工皇帝」，僅次於球隊史上最高薪球員奧斯爾，呢位早前宣布退休嘅德國名將，效力阿仙奴期間擁有35萬鎊周薪。

布卡約沙卡近年愈戰愈勇，今季英超已射入12球及10次助攻，成為兵工廠高居榜首嘅功臣，踢好波自然有好報，獲得加薪續約絕對合理。