眾望所歸！費Sir雲格入英超名人堂

最強博彩盤路過關神器《串績王》：http://win.on.cc/football/　

英超兩大傳奇領隊費格遜同雲格，周三(29日)齊齊獲選入英超名人堂，眾望所歸成為首批入圍嘅英超領隊。費Sir帶領嘅曼聯同雲格執教嘅阿仙奴，曾經進行接近20年嘅爭霸，兩人合共贏過16次英超冠軍，今次入選實至名歸。

現年81歲嘅費格遜表示：「好開心進入名人堂，得到呢次認可係無上光榮，但呢個榮譽唔係我一個人，而係多年來喺曼聯嘅工作同成績，所以我亦為曼聯球會上下感到光榮。」雲格就表示：「好榮幸同費格遜一齊得獎，我哋就好似兩個拳擊手，喺擂台上盡力打倒對方，但擂台之外互相尊重，希望可趁今次機會同費格遜飲番杯，回憶下以往嘅事情。」

阿仙奴領隊阿迪達當年係雲格所簽，佢恭賀舊波士：「雲格改變咗英格蘭足球，為其他國家打開英超大門，令呢個聯賽變得更好，佢嘅視野、理念同執教方式都對世界球壇造成影響。」曼聯領隊坦哈格亦道賀：「費格遜寫下足球傳奇，曼聯就係費格遜。」