迪基亞拒絕減薪續約　曼聯急斟德甲鋼門

最強博彩盤路過關神器《串績王》：http://win.on.cc/football/　

曼聯門將迪基亞將於今夏約滿，會方早前向佢提出減薪續約要求，根據英國《每日郵報》爆料，呢位32歲西班牙鋼門已經拒絕。最新消息指紅魔鬼制定「B計劃」，密斟德甲勁旅多蒙特門將基哥高保，作為迪基亞嘅替代人選。

迪基亞現時周薪高達37.5萬鎊，曼聯管理層有意為球員制定薪酬上限，希望將新加盟球員及續約球員嘅人工，限定喺20萬鎊周薪或以下。意味如果迪基亞續約，需要減接近一半人工，據悉佢唔肯接受呢個條件。

曼聯方面亦有兩手準備，開始物色新門將，德國傳媒指紅魔鬼睇中多蒙特門將基哥高保，計劃簽入呢位25歲瑞士國腳，作為迪基亞嘅接班人。

身高1米94嘅基哥高保出身於德甲球隊賀芬咸，亦效力過奧格斯堡、史特加，2021年加盟多蒙特之後，表現愈來愈出色，成為球隊現時高居德甲榜首嘅功臣。

多蒙特一向認錢唔認人，對於出售基哥高保持開放態度，並要求4,500萬鎊轉會費，依家就睇曼聯願唔願意接受呢個價錢。