英超最快前鋒誕生　夏蘭特僅排第4位

足球博彩神器，每日重心提供盡在《彩報》：http://win.on.cc/football/　

根據Squawka統計，今季英超奔跑速度最快前鋒，原來係效力諾定咸森林嘅班倫莊臣，呢位威爾斯國腳曾經做出時速36.7公里衝刺，屬於英超前鋒之冠，反而步大力雄嘅曼城射手艾寧夏蘭特，以時速36.22公里僅排第4位，令人跌眼鏡。

現年21歲嘅班倫莊臣今季英超上陣27場入7球，入波數字唔多，但勝在速度快，為對手防線帶來唔少壓力。至於第2位係由愛華頓轉投紐卡素嘅安東尼哥頓，曾經跑出時速36.61公里。

利物浦前鋒達雲紐尼斯以時速36.53公里排第3位，射手榜一哥艾寧夏蘭特以時速36.22公里位列第4位。第5位係阿仙奴翼鋒加比爾馬天尼利(35.85公里)，第6位係曼聯前鋒拉舒福特(35.81公里)。

另外，阿仙奴左閘基蘭泰亞尼屬於速度最快後衞，時速達35.99公里，仲快過隊友加比爾馬天尼利，曼聯後衞達洛治以時速35.76公里排第2位。