拿玻里大鑊！域陀奧森漢受傷抖數星期

足球博彩神器，每日重心提供盡在《彩報》：http://win.on.cc/football/　

拿玻里今季力爭成意甲及歐聯「雙冠王」，但依家受到沉重打擊，會長迪羅倫迪斯透露，首席射手域陀奧森漢早前踢國際賽期間受傷，需要休息數星期，意味將缺陣下周一(3日)凌晨意甲主場對AC米蘭，甚至可能無緣歐聯8強賽事。

域陀奧森漢3月底為尼日利亞踢咗2場非國盃外圍賽，並冇波入，更加整傷左腳大腿肌肉，迪羅倫迪斯話：「奧森漢應該會缺陣數周，希望唔好抖太耐，對AC米蘭嘅比賽，任何賽果都有可能出現，對方都有出色球員。」域陀奧森漢今季意甲射入21球，排射手榜榜首，佢缺陣之下，勢必削弱球隊攻力。

拿玻里現時喺聯賽領先第2位拉素19分，捧盃機會高唱入雲，域陀奧森漢養傷，影響最大係歐聯戰線，拿玻里將於4月13日凌晨歐聯8強首回合作客AC米蘭，6日後返主場踢次回合，換言之，加埋聯賽，雙方將於4月3次交鋒。