車路士又輸樸達等炒魷 新帥目標已定

2023年04月02日 08:00
東網電視
更多新聞短片
最強博彩盤路過關神器《串績王》:http://win.on.cc/football/ 
周日(2日)凌晨英超賽事,車路士主場0比2不敵阿士東維拉,喺聯賽榜已經跌出前半部,球迷對領隊樸達亦忍無可忍,紛紛要求班主保利盡早換帥,博彩公司將佢成為英超下個被炒領隊賠率急降,車路士周三(5日)凌晨對利物浦將成樸達生死戰,著名記者Romano透露球會已準備接洽拿高斯文執教。
車路士上月3連勝兼打入歐聯8強,以為終於回復水準,點知今仗又打回原形,18分鐘古古列拿頭槌解圍失誤變自殺式助攻,奧尼屈堅斯單刀笠射先開紀錄。車路士雖然製造唔少攻門,但把握能力極差,56分鐘再被約翰麥甘尼遠射轟入,最終喺主場球迷一片噓聲下慘吞2蛋。
樸達賽後表示:「我哋要接受賽果同做好啲,自怨自艾係冇用,今場嘅數據其實好理想,球員已經盡最大努力,我會為成績負責。」數據顯示,車路士今季面對英超前10名球隊未贏過,而佢哋最後10場聯賽當中,有7場對手係排喺前10名,包括周三主場對利物浦嘅「樸達生死戰」。
博彩公司betfair將樸達被炒賠率急降,由賽前12倍跌到2倍,熱過晒2.5倍嘅韋斯咸領隊莫耶斯同4.5倍嘅李斯特城領隊羅渣士。著名記者Romano亦爆料:「雖然高層一直支持,但樸達再次受到炒魷壓力,車路士一直視拿高斯文係長遠領隊人選,拭目以待。」