林柏特現身！傳回巢教車路士到季尾

最強博彩盤路過關神器《串績王》：http://win.on.cc/football/　

車路士班主保利再有驚人部署，周三(5日)凌晨對利物浦一仗，前領隊林柏特忽然喺史丹福橋球場看台現身，據英國《太陽報》報道，呢位車路士傳奇有望回巢，出任看守領隊至今個球季完結。

44歲嘅林柏特係車路士史上入波最多球員，2019年曾經接替沙利出任車路士領隊，但只係教咗1年半左右就被炒魷，林柏特之後執教愛華頓，今年1月被解僱後一直待業。今場林柏特突然現身車路士看台，英國《太陽報》指保利正慎重考慮，請佢返嚟頂到季尾，相信佢嘅經驗會比現時看守領隊般奴沙托更適合領軍。

無論林柏特係咪同意回巢，車路士今夏仍然會搵一個適合嘅長遠領隊，前拜仁慕尼黑教練拿高斯文同前西班牙領隊安歷基都係熱門人選，前熱刺領隊普捷天奴亦係新帥候選名單之一。