拜仁諗縮數　想續借祖奧簡斯路

足球博彩神器，每日重心提供盡在《彩報》：http://win.on.cc/football/　

拜仁慕尼黑喺歐聯8強將會同曼城交鋒，兩間球會除比賽之外仲有生意要傾，據報拜仁已決定唔會啟動曼城借將祖奧簡斯路嘅「買斷條款」，但又想繼續留用呢位葡萄牙國腳，所以計劃向曼城提出再借用1季。

祖奧簡斯路1月份由曼城外借拜仁後，12場比賽已貢獻1入波+4助攻，不過英國《每日鏡報》報道，拜仁認為祖奧簡斯路合約內嘅6,200萬鎊買斷條款太高，球隊冇可能負擔得起，所以希望同曼城重新商討延長借用1年，並且將買斷費降至3,000萬鎊。據報曼城領隊哥迪奧拿已經唔預祖奧簡斯路回歸，希望夏天盡快將佢賣走。

28歲嘅祖奧簡斯路表示喺拜仁生活如意，暗示希望繼續留隊：「球員要時間適應新環境，我一直嘗試盡快融入，目前嘅發展非常正面，無論係球隊定個人目標都好順利。」