麥亞里士打父親爆料：阿仔今夏轉會

最強博彩盤路過關神器《串績王》：http://win.on.cc/football/　

白禮頓阿根廷中場阿歷斯麥亞里士打世盃後身價上升，盛傳利物浦同曼聯準備斟介，轉會費至少6000萬鎊(約5.9億港元)，其父親兼經理人卡路士麥亞里士打日前爆料，如無意外，阿仔今夏將會轉會。

卡路士麥亞里士打係前阿根廷國腳，上陣3場，曾經同已故「球王」馬納當拿並肩作戰，佢亦經常用呢段經歷激勵兒子，去年阿歷斯麥亞里士打終於達成老父心願，協助阿根廷贏得世盃，係美斯拍檔之一。

卡路士麥亞里士打向阿根廷《Bolavip》爆料稱：「如無意外，下個轉會窗一到，佢就會轉會，我唔知去邊隊，但已經開始傾，估計到7月，佢就會去另一支球隊。」曼聯同利物浦同樣物色中場，24歲嘅阿歷斯麥亞里士打成為目標，由老竇做埋經理人，相信會幫阿仔揀隊合心水球隊。