球證執法惹爭議　般費「被屈」黃牌慘停賽

足球博彩神器，每日重心提供盡在《彩報》：http://win.on.cc/football/　

曼聯近期行衰運，拉舒福特、利辛度馬天尼斯等主力接連受傷，就連球證執法都對佢哋不利。周五(14日)歐霸盃主場對西維爾一仗，般奴費南迪斯因手球被罰黃牌，次回合要停賽，里奧費迪南等名宿炮轟球證「老屈」，而西維爾中場拉美拿曾粗暴踩卡斯米路腳脛，走甩紅牌亦有爭議。

今場移後校炮嘅般奴費南迪斯，上半場尾段飛身阻擋對手射門，個波近距離省落佢手肘，球證即時出示黃牌，意味般奴費南迪斯次回合要停賽。呢個判決令一眾曼聯名宿不滿，史高斯表示：「個球證好差，佢一直搵機會出黃牌，呢個波根本唔係有心，判罰球已經足夠。」夏格維斯就話：「離奇嘅判決，冇可能要黃牌。」

喺手球事件前亦有爭議事件，卡斯米路同拉美拿爭波快一步搶贏，但拉美拿唔收腳直踩卡斯米路腳脛，VAR亦介入檢視紅牌可能性，但最終球證只係出示黃牌。里奧費迪南表示：「一個紅牌嘅犯規變黃牌，般奴費南迪斯嗰下根本唔需要黃牌，佢當時瞓身擋波，請問隻手可以擺喺邊？」