李斯特城散貨　「紅軍」打包中場孖寶

足球博彩神器，每日重心提供盡在《彩報》：http://win.on.cc/football/　

啱啱換帥嘅李斯特城今季成績差勁，依家排喺英超第19位，降班危機非常嚴峻。據英國傳媒報道，李斯特城財政危機嚴重，如果連英超資格都保唔住，今個夏天將面臨大清洗，占士麥迪臣等球星成為搶手貨，有傳利物浦有意將佢同泰利文斯「打包」撬走。

李斯特城上星期公布財政報告，錄得9,300萬鎊(約9.1億港元)巨額虧損，若果來季真係降班英冠，對財政打擊非常沉重，賣球星係事在必行。占士麥迪臣、哈維班尼斯、艾馬迪等好波之人勢必離隊，英超各豪門都虎視眈眈等執平貨。

據報利物浦放棄收購祖迪比寧咸後，中場目標亦轉移到李斯特城身上，除咗想簽今夏約滿嘅比利時國腳泰利文斯，仲想簽埋占士麥迪臣，呢位英格蘭進攻中場同李斯特城只剩1年幾約，估計5,000萬鎊(約4.9億港元)轉會費就可以成事。