拒同C朗做隊友　沙夏寧願放棄900萬鎊年薪肥約

足球博彩神器，每日重心提供盡在《彩報》：http://win.on.cc/football/　

水晶宮翼鋒韋費特沙夏將於今夏約滿，可以自由身離隊，英國《每日郵報》指擁有C朗助陣嘅沙特阿拉伯豪門艾納斯向韋費特沙夏開出900萬鎊(約8,800萬港元)年薪合約，邀請佢加盟。不過，呢位30歲科特迪瓦國腳唔想同「球霸」C朗做隊友，已經拒絕轉投艾納斯。

韋費特沙夏今季為水晶宮踢24場英超，射入6球及2次助攻，由於佢拒絕續約，意味將於今夏自由身離隊。C朗近期要求艾納斯簽入高質素外援輔助自己，會方睇中曾經效力曼聯嘅韋費特沙夏。

不過，韋費特沙夏傾向留喺歐洲搵食，AC米蘭、多蒙特、阿仙奴、熱刺、車路士都有意簽佢，冇必要去沙特搵食，特別係一旦加盟艾納斯，同C朗做隊友，可能會承受「額外壓力」，令自己發揮受限制，佢寧願賺少啲，都唔想去艾納斯睇C朗面色做人。