屈堅斯省兩粒　維拉劏鵲爭踢歐洲賽

最強博彩盤路過關神器《串績王》：http://win.on.cc/football/　

周六（15日）晚英超頭場，阿士東維拉射手奧尼屈堅斯省兩粒兼交出助攻，喺主場以3比0大勝紐卡素，終止「喜鵲」5連勝之餘，維拉近8仗聯賽贏7場，有力衝擊下屆歐洲賽入場券。

雖然紐卡素排名較高，但維拉藉地利一開波即搶攻，箭頭奧尼屈堅斯單刀射中柱，11分鐘佢頭槌二傳，交畀積及藍斯轟入靚波，極速打開紀錄。「喜鵲」其後未見起色，下半場繼續由屈堅斯做主角，佢先因越位食咗鋪詐胡，64分鐘阿歷斯摩蘭奴左路橫傳，屈堅斯力壓丹般恩轉身快射破網，連續4仗聯賽有士哥，末段佢再接應積及藍斯妙傳撞射得手，最終大勝3粒，近8仗聯賽豪取7勝1和，中途接手嘅主帥艾美利，將維拉從降班漩渦，帶到上爭前列爭踢下屆歐洲賽，認真犀利。