西維爾再三屠魔　曼聯連續6年被西甲兵踢走

最強博彩盤路過關神器《串績王》：http://win.on.cc/football/　

曼聯自2017年贏歐霸盃冠軍後，喺歐洲賽一直逃唔過「西甲魔咒」，連埋今屆輸畀西維爾，佢哋已經連續6年喺淘汰賽被西甲球隊踢出局，其中西維爾就包辦其中3次，堪稱係「屠魔專家」。

曼聯2018年喺歐聯16強對西維爾，2回合計輸1比2出局；2019年殺入歐聯8強，但被巴塞隆拿「雙殺」大敗0比4；2020年闖入歐霸盃4強，結果又輸畀最後冠軍西維爾；2021年曼聯勇闖歐霸盃決賽，但就飲恨由艾美利帶領嘅維拉利爾腳下；上年曼聯再戰歐聯殺入16強，又過唔到馬德里體育會嗰關；今屆更喺歐霸盃8強第3度被西維爾踢走。

歐霸盃被球迷戲稱為「西維爾盃」唔係冇道理，呢支西甲名牌今季聯賽雖然成績差勁，但踢歐霸盃就判若兩隊，今屆係佢哋歷來第7次殺入歐洲足協盃/歐霸盃4強，對上6次都可以入決賽兼捧盃，佢哋喺準決賽將會大戰意甲祖雲達斯。