加利仔同球迷打賭　睇死阿仙奴冇冠軍

足球博彩神器，每日重心提供盡在《彩報》：http://win.on.cc/football/　

阿仙奴今季英超大部份時間坐喺榜首，不過曼聯名宿加利尼維利一直抱有懷疑，睇死「兵工廠」會冧檔畀曼城爬頭，日前更同球迷打賭，講明如果阿仙奴最後捧盃，佢會喺煞科日着住阿仙奴波衫嗌「阿仙奴冠軍」，周六(22日)對修咸頓賽前更公開佢預備嘅阿仙奴波衫，擺明踩場。

季中阿仙奴喺榜首領放嗰陣，加利仔已經「預言」佢哋係虛火，最後會被曼城同曼聯超前，近日佢再分析：「曼城好似一部壓路機，力量非常強大，佢哋有豐富嘅衝冠經驗，阿仙奴近期連場失分，只會令曼城更加有信心。」

日前加利仔同阿迷打賭，佢為《天空體育》報道阿仙奴對修咸頓一仗賽前，就公開一件復古嘅綠色阿仙奴波衫，話阿仙奴如果成功奪冠，佢就着住呢件衫嗌「阿仙奴冠軍」，否則質疑佢嘅球迷就要道歉。網上流傳一張尼維利兄弟細個着阿仙奴波衫嘅舊照，當時加利仔就係着同款綠色波衫。