熱刺21分鐘失5球　前4大戰遭紐卡素蹂躪

周日（23日）英超頭場之一，紐卡素主場對熱刺，原本被視為勢均力敵之戰，點知熱刺發波瘟，開波僅21分鐘已連失5球，最終慘敗1比6，爭下屆歐聯入場券嘅機會愈來愈渺茫。

賽前紐卡素排第4位，領先打多1場嘅熱刺3分，絕對係爭前4嘅下屆歐聯入場券關鍵戰。不過熱刺猶如不設防，畀紐卡素予取予攜，一開波祖連頓勁射被洛里斯救出不遠，積及梅菲執雞補中，極速打破僵局，6分鐘輪到祖連頓窄位抽射破網，跟住梅菲遠射又得手，加上箭頭阿歷山大伊沙克短時間內梅開二度，「喜鵲」喺開波僅21分鐘已遙遙領先5粒，係英超史上第2快領先5比0嘅球隊，只係比曼城喺2019年9月開波18分鐘領先屈福特5比0慢少少，輸到咁肉酸，部分熱刺粉絲都冇眼睇拉隊離場。

下半場熱刺換走冇晒信心嘅門將洛里斯，由後備門將費沙科士打，射手哈利卡尼冇耐立即追番粒，但「喜鵲」前鋒哥林威爾遜近門建功，最終熱刺大敗而回，贏波嘅紐卡素殺上第3位，爭取下屆歐聯入場券機會愈來愈大。