紐卡素增兵迎接歐聯　搶購國米中場

足球博彩神器，每日重心提供盡在《彩報》：http://win.on.cc/football/　

紐卡素今季好大機會取得英超前4位，參加下屆歐聯，根據英國《太陽報》爆料，「喜鵲」領隊艾迪侯域正在制訂今夏收購名單，提升球隊實力迎接歐聯，頭號目標係以3,100萬鎊(約3億港元)收購國際米蘭中場波索域。

現年30歲嘅波索域2015年由薩格勒布戴拿模轉投國際米蘭，一直效力至今，為呢支意甲勁旅上陣318場入30球及38次助攻，艾迪侯域之所以睇中呢位克羅地亞國腳，全因為佢擅長墮後組織攻勢及防守，簽入佢之後，可以「解放」陣中巴西國腳般奴古馬雷斯，令佢專注進攻工作，從而提升球隊整體攻守效率。

由於波索域今季喺國米逐漸失寵，僅於聯賽13次正選上陣，紐卡素方面有信心出3,100萬鎊轉會費，就可以打動國米放人。不過，盛傳巴塞隆拿都睇中波索域，估計紐卡素可能需要加碼，先至可以買到呢位猛將。