【官宣】加拿祖續約5年　魔迷期望佢成下一位C朗

足球博彩神器，每日重心提供盡在《彩報》：http://win.on.cc/football/　

曼聯正式宣布同翼鋒阿歷真度加拿祖續約5年至2028年夏天，粉碎皇馬等豪門想收購呢位18歲阿根廷國腳嘅傳聞，紅魔鬼球迷對於加拿祖續約，都感到非常興奮，期望佢成為下一位C朗。

阿歷真度加拿祖3年前由馬體會青年軍轉投曼聯青年軍，上季季尾首次為一隊上陣，今季備受領隊坦哈重用，各項賽事上季32次，射入5球及6次助攻，可惜上月中對修咸頓一役受傷，已經缺陣一個半月。

加拿祖續約之後話：「我覺得好驕傲同激動，好開心可以繼續喺曼聯嘅生涯，同隊友們一齊去實現目標，感謝領隊同教練團對我嘅幫助，令我不斷進步，邁向成功，希望喺球迷面前，創造更多美好回憶。」

由於加拿祖一直視C朗為偶像，加上呢位葡萄牙球星首度加盟曼聯正係18歲，紅魔鬼球迷紛紛喺網上留言，希望加拿祖續長約之後，可以重演當年C朗走上巨星之路嘅好戲。