夏蘭特平英超神射手紀錄　向40+進發

足球博彩神器，每日重心提供盡在《彩報》：http://win.on.cc/football/　

曼城上仗英超作客以2比1擊敗富咸，前鋒艾寧夏蘭特射入1球12碼，以34球追平2位傳奇射手高爾、舒利亞共同保持嘅單季英超最多入波紀錄，「藍月亮」今季仲有6場聯賽，相信夏蘭特好大機會成為英超史上首位入波「40+」神射手。

高爾效力紐卡素時期，於1993/94年球季英超射入34球，緊接之後1994/95年球季，當時仲係效力布力般流浪嘅舒利亞，亦喺英超有34球進帳。值得一提，該兩季英超都係有22支球隊，踢42輪聯賽，其後英超「裁軍」至20隊，令後輩更難超越2人紀錄。

不過，艾寧夏蘭特今季英超僅上陣30場已入34球，效率非常驚人，呢位22歲挪威國腳要喺餘下6場英超再入6球，達到40球大關，應該唔難。包括盃賽在內，夏蘭特今季為曼城上陣44場已經入50球。

此外，曼城取得英超8連勝，唔止搶走阿仙奴榜首之位，仲超越對方，成為今季英超最長連勝球隊。