利物浦白禮頓互斟中場　米拿換麥亞里士打

白禮頓現正斟介即將離開利物浦嘅占士米拿，打算喺今季結束前落實交易，與此同時，利物浦近日就收購阿歷斯麥亞里士打，向白禮頓正式報價，兩隊互斟對方中場，各取所需。

轉會專家Fabrizio Romano報道，37歲嘅占士米拿今夏回復自由身，白禮頓爭取喺球季結束前落實簽約，交易即將達成，白禮頓有信心喺未來數日或數星期完成交易，海鷗早前已簽入屈福特前鋒祖奧柏度，占士米拿將會係今夏第2位新兵。

利物浦方面，就收購阿根廷世盃冠軍成員阿歷斯麥亞里士打採取實際行動，正式報價，金額未有披露，《阿斯報》報道，白禮頓同該24歲中場已達成協議，收到合適報價就會放人，目標價7000萬歐元(約6.07億港元)。

利物浦向麥亞里士打提交球隊計劃及財務報價，雙方開始談判，預料耗時數星期，紐卡素同曼聯都有意加入競爭，不過暫時未有正式報價。