拿玻里相隔33年再贏意甲　馬納當拿保佑！

足球博彩神器，每日重心提供盡在《彩報》：http://win.on.cc/football/　

拿玻里重奪意甲冠軍！周五(5日)凌晨意甲賽事，拿玻里作客1比1逼和烏甸尼斯，呢1分足夠令佢哋提前5輪封王，自球王馬納當拿喺89/90球季帶領球隊奪冠後，相隔33年再嘗意甲冠軍滋味。完場後那不勒斯全城瘋狂慶祝，教練史巴列堤更表示：係馬納當拿天上保佑！

今場只要拎1分就捧盃嘅拿玻里，13分鐘被烏甸尼斯嘅洛夫域率先攻陷，直到52分鐘終於靠「進攻孖寶」合作追平，基華拉斯基利亞禁區頂射門被撲出，首席射手域陀奧森漢補射入網。拿玻里打和後，喺只剩5輪聯賽下領先次名拉素16分，提前鎖定意甲冠軍寶座。

拿玻里捧盃後，大批球迷上街慶祝狂歡，拿玻里對上一次贏意甲(1990年)，已經係馬納當拿領軍嘅年代，史巴列堤賽後表示：「見到拿玻里一班死忠嘅笑容令我好激動，球會嘅成功可以令佢哋克服生活上嘅困難，佢哋見證過馬納當拿比賽，或者拿玻里今季成功係得到馬納當拿天上保佑！」

馬納當拿喺2020年11月離世，佢嘅一班後輩亦非常爭氣，阿根廷國家隊上年底喺卡塔爾勇奪世盃冠軍，係自1986年馬納當拿之後首度封王；今次拿玻里重奪意甲，亦係馬納當拿後第1次，「球王效應」唔講得笑！