足總盃　李輝立爆響口：祖連奴將投傑志

港超聯球隊標準流浪周六（13日）在「足總盃」決賽1比7不敵傑志，屈居亞軍，總監李輝立（Philip）賽後承認兩隊技術有差距，又透露祖連奴將轉投傑志，認為這令流浪今場處境變得尷尬。

祖連奴是役正選出擊，但Philip謂這名隊中主力已承認與傑志達成協議，對球隊造成一定影響：「我覺得足總都要諗吓，香港球圈咁細，點解畀球員喺3個月之前就同其他隊傾好，咁樣會搞到我哋好難做，因為我哋唔夠人用，好難唔出佢。」

Philip續稱對此感到無奈，表示賽前已鼓勵祖連奴盡力表現實力：「開波之前叫佢盡力踢場好波，留低個好印象畀大家，我唔敢評論佢有冇盡全力，只可以話球員已經盡做，輸咗冇乜好怨。」

此外，李輝立認為賽果反映技術差距，加上球員不擅雨戰，招致落敗，但整體對全季戰績感到滿意：「球員全季努力贏咗咁多場波，攞到聯賽第3，仲要贏過兩次傑志，所以呢場本身幾有信心，但始終兩隊技術有分野，同埋大家可能唔慣踢水戰所以輸咗。」談到之後的亞洲賽部署，Philip表示會努力尋找新球員代替祖連奴，希望隊中球員可汲取經驗，並表示已與台灣企業甲組聯賽球隊Futuro總教練王家中簽約，對方將帶領球隊出戰亞洲賽。