熱刺選帥篩剩2個　安歷基 VS 施洛

足球博彩神器，每日重心提供盡在《彩報》：http://win.on.cc/football/　

熱刺領隊唔易做，連普捷天奴、摩連奴同干地等頂級教頭都被炒魷，就知道難度極高。據英國《每日郵報》報道，熱刺主席利維物色新帥計劃已進入最後階段，依家篩剩2個人選，早前被視為大熱嘅拿高斯文榜上無名，新帥將由安歷基同施洛爭逐。

熱刺漁翁撒網式搵領隊，普捷天奴、羅渣士、拿高斯文同沙比阿朗素先後拒絕，消息指依家名單只係剩番安歷基同施洛。知情人士指，熱刺對啱啱帶領飛燕諾贏荷甲冠軍嘅施洛非常期欣賞，視呢位44歲荷蘭教頭係歐洲最佳年輕領隊之一，不過飛燕諾亦希望同施洛續約，就算放人亦會索取約600萬鎊(約5,830萬港元)賠償金。

另一人選係前西班牙領隊安歷基，佢教過巴塞隆拿、羅馬等大球會，經驗明顯更加豐富，而且佢嘅執教風格更加適合熱刺現有球員，反而施洛嘅主攻踢法需要對陣容進行大規模整頓，加上安歷基依家係自由身，斟介難度較低。