【香港足球明星選舉】「最佳教練」‧ 盧比度

2022至23年度「香港足球明星選舉」頒獎典禮，周二(23日)晚假九龍灣某大宴會廳舉行，其中「最佳教練」由東方主教練盧比度（Chino）力壓「3冠王」傑志主帥朱志光、理文少帥曾昭達獲獎。Chino本季帶領東方殺入「高級組銀牌」決賽、「足總盃」和「賽馬會菁英盃」4強，他直言全靠球隊上下一心爭取好成績，才能令自己取得獎項。

Chino球員時期曾成為「香港足球先生」，如今奪得「最佳教練」，他表示這種喜悅「難以用文字表達」，又形容是次獲獎「可能是生命裏最美妙的一刻」：「其他人投票嗰陣，可能唔止考慮球隊有冇冠軍落袋，始終有候選人攞咗冠軍，可能會有啲優勢，所以真係好開心有獎攞。」

盧比度開季曾形容本季將是「要拼命生存的1年」，他最後帶領球隊以第4位完成聯賽，各項盃賽都能戰至較後階段，演出獲外界好評，他把功勞歸功於全體職球員，直言因全隊上下奮戰，才能令自己獲得肯定：「球隊有唔少後生仔，但佢哋每場波都付出所有，令球隊成績都幾唔錯，係佢哋幫我拎呢個獎。」