阿仙奴天價續約沙卡 斥巨資搶英格蘭孖寶

2023年05月24日 08:00
東網電視
更多新聞短片
阿仙奴準備夏天大展拳腳。
最強博彩盤路過關神器《串績王》:http://win.on.cc/football/ 
今季英超意外成為爭標份子嘅阿仙奴,大好形勢下失落冠軍,球隊已為下季捲土重來做準備,周二(23日)宣布成功同王牌新星布卡約沙卡續約4年,據報周薪高達29萬鎊(約282萬港元)。消息指阿仙奴更會斥資2億鎊(約19.5億港元)夏天買人,最大目標直指兩大英格蘭國腳迪格蘭賴斯同美臣蒙特。
21歲嘅布卡約沙卡今季英超有13個入波同11次助攻,係阿仙奴爭標嘅核心人物,佢同球會合約原本只剩1年,曼城等豪門都有意挖角,不過阿仙奴周二宣布成功續約,人工由7萬鎊(約68萬港元)跳升至29萬鎊,升為隊中最高薪球員,沙卡續約後表示:「我好開心,阿仙奴係最好嘅球會畀我踏入下個階段,我身邊有最好嘅家人、隊友、職員,相信佢哋可以幫我交出最好嘅自己。」
阿仙奴成功挽留陣中主力後,目光會即刻轉移去轉會市場上,《The Athletic》報道「兵工廠」夏天將有約2億鎊軍費買人,其中中場係重點區域,尤其格列沙加重返德甲在即,阿仙奴至少會引入2名新中場,包括1億鎊(約9.7億港元)收購韋斯咸中場迪格蘭賴斯,呢位英格蘭國腳係頭號目標,白禮頓中場摩西斯卡些度就係後備人選。
除咗防中位置外,車路士嘅美臣蒙特亦係阿仙奴獵物,佢同車路士續約遲遲未有着落,若果最終續約失敗,預計今個夏天將被車路士賣走,而美臣蒙特同迪格蘭賴斯情同兄弟,阿仙奴有望「一箭雙鵰」打包收購。報道指阿仙奴仲想簽多1個前鋒同1個後衞,或者賣走部份球員套現軍費。