飛起寸王？PSG加入爭奪安歷基

足球博彩神器，每日重心提供盡在《彩報》：http://win.on.cc/football/　

早前盛傳巴黎聖日耳門(PSG)計劃聘請羅馬主帥摩連奴執教，但根據法國傳媒最新報道，呢支法甲勁旅改變主意，打算請前西班牙國家隊領隊安歷基接手領軍。

PSG雖然奪取聯賽冠軍在望，但過程並唔輕鬆，加上歐聯16強出局，會方唔滿意教練加迪亞表現，準備今夏再次換帥。PSG原本睇中摩連奴，但「寸王」始終有教職在身，加上一旦協助羅馬奪得歐霸盃冠軍，就未必會離隊。

此外，PSG高層睇完羅馬喺歐霸盃嘅「泊大巴」踢法，開始意識到摩連奴嘅保守戰術，唔適合PSG主攻傳統，所以改為將安歷基列為頭號新帥目標。

雖然安歷基執教西班牙喺上年世界盃16強出局，但佢擔任巴塞隆拿期間戰績彪炳，包括捧過歐聯冠軍，PSG一直視歐聯王者寶座為最重要目標，亦係安歷基獲得PSG管理層垂青嘅主要原因。

據悉熱刺、拿玻里都有意邀請安歷基執教，PSG現時亦加入爭奪戰，呢位53歲西班牙名帥成為搶手貨。