拜仁預訂慶祝場地　捧盃派對叫兩飛

足球博彩神器，每日重心提供盡在《彩報》：http://win.on.cc/football/　

德甲聯賽星期六(27日)煞科，雖然冠軍主導權已經落喺多蒙特手上，不過拜仁慕尼黑仍然宣布，已經預訂慕尼黑地標瑪利恩廣場作為冠軍派對慶祝地點，事關就算拜仁慕尼黑男子隊未能奪冠，女子隊都有望喺周日(28日)封后，捧盃派對叫兩飛。

拜仁男子隊要喺煞科戰贏科隆，同時希望多蒙特主場失分先可以捧盃，奪冠命運要假手於人，但拜仁女子隊就形勢大好，佢哋煞科戰對住包尾兼已降班嘅Turbine Potsdam，只要贏波就可以壓倒禾夫斯堡女足封后，捧盃機會遠遠高過男子隊。

拜仁今次Book定瑪利恩廣場慶祝，深信至少有一隊可以用到巡遊巴士，會長漢拿表示：「我哋衷心希望星期日可以慶祝兩個冠軍，我哋會毫無保留咁去爭取勝利，無論係1隊定2隊，我哋都想同球迷慶祝呢個咁刺激嘅球季，當然最好係男女隊一齊慶祝啦！」