阿仙奴好消息　迪格蘭賴斯同意入「廠」

足球博彩神器，每日重心提供盡在《彩報》：http://win.on.cc/football/　

阿仙奴爭取收購韋斯咸中場迪格蘭賴斯，取得重大突破，呢位24歲英格蘭國腳已經同意今夏加盟兵工廠，現時只係等兩間球會達成轉會費，就可以成事。

迪格蘭賴斯希望今夏轉會已經係公開嘅秘密，阿仙奴一直屬於大熱買家，近期曼聯亦加入爭奪，根據英國《太陽報》消息，迪格蘭賴斯傾向加盟阿仙奴。

韋斯咸亦深知無法留住呢位猛將，願意以1億鎊(約9.7億港元)出售佢，但阿仙奴認為價錢太高，希望對方減低至8,500萬鎊(約8.2億港元)，成為交易一大分歧。

韋斯咸將於6月8日凌晨出戰歐協聯決賽對費倫天拿，預料比賽之後，就會正式展開出售迪格蘭賴斯嘅工作。一旦完成交易，韋斯咸將會收購修咸頓「罰球王」禾特普斯，填補迪格蘭賴斯嘅位置。