費事眼冤？保利唔睇車路士謝幕戰

足球博彩神器，每日重心提供盡在《彩報》：http://win.on.cc/football/　

英國傳媒報道，車路士班主保利可能缺席球隊對紐卡素嘅主場謝幕戰，表面理由係返咗美國處理其他事務，但真正原因坊間就有唔同揣測，可能佢費事眼冤，又或者打算減少對球隊干預。

《每日電訊報》報道，按照英超傳統，各隊球員在主場謝幕賽事，都會向場邊球迷致謝，上星期就曾發生過熱刺被球迷喝倒采事件，車路士今季成績比熱刺更差，到時會否出現球迷針對班主嘅行動，到時先知。

傳媒收到風，保利近日一直喺美國，雖然佢可以隨時返倫敦睇波，但如果按原定計劃，保利應該唔會出席車路士謝幕戰，報道指，保利缺席與球迷對佢不滿無關，亦唔代表佢減少對球隊嘅參與度。

一直有傳保利經常干預球隊，帶朋友入更衣室參觀，球隊準備比賽受到影響，如果今場佢唔喺度，話唔定球員反而可以集中精神，踢場爭氣波喎。