美斯入波率PSG封王　做埋5大聯賽士哥王

最強博彩盤路過關神器《串績王》：http://win.on.cc/football/　

周日(28日)凌晨法甲賽事，巴黎聖日耳門(PSG)作客1比1打和斯特拉斯堡後，提前一輪鎖定法甲冠軍。今場入波嘅美斯，累積496個歐洲5大聯賽入波，超越「死對頭」C朗拿度(495球)，成為歐洲5大聯賽史上入波最多球員。盛傳美斯將會結束2年法甲之旅，呢個亦算係圓滿句號。

PSG今場只要拎1分就封王，但今場表現唔及主隊銳利，上半場互交白卷。59分鐘兩大球王合作，基利安麥巴比左路傳入禁區，美斯巧妙入楔射成1比0，雖然斯特拉斯堡79分鐘由加美路追平，但1比1嘅賽果亦足夠令PSG奪冠，亦係PSG近6年第5次喺法甲封王。

盛傳帥位不穩嘅PSG教練加迪亞賽後表示：「我哋今日睇咗德甲煞科，你會明白贏冠軍係好難，喺任何聯賽都一樣，大家要知道贏法甲冠軍唔係一件平常事，即使係巴黎聖日耳門都一樣。」美斯今夏同PSG約滿，消息指佢幾乎肯定離隊，煞科戰對克萊蒙特好可能係球王嘅告別戰。