李城童話7年後悲情破滅 降班3隊勢被肢解

2023年05月29日 08:00
東網電視
更多新聞短片
李斯特城7年內由盛轉衰。
最強博彩盤路過關神器《串績王》:http://win.on.cc/football/ 
22/23球季英超曲終人散,煞科戰有人歡喜有人愁,焦點嘅護級戰場最終由愛華頓逃出生天,李斯特城、列斯聯將陪同修咸頓一齊降落英冠。李斯特城2016年童話式贏英超冠軍,7年間急速由盛轉衰,據報降班球隊即時損失至少6,000萬鎊(約5.8億港元),3支降班隊陣中嘅主力球員勢必跳船,面臨被列強肢解。
李斯特城喺煞科戰雖然贏韋斯咸,但唔足夠超越同樣贏波嘅愛華頓,領隊甸恩史密夫賽後表示:「所有人都好失望,我上任後嘅8場波以11分為目標,但最終只得9分,所以我失敗咗,但球員已搵番自信。」李斯特城對上一次喺英超降班係2004年,4年之後再跌落英甲。
李斯特城喺2014年升上英超,升班第2季就童話式捧英超冠軍,當年佢哋以平價吸納尼高路簡迪、馬列斯、占美華迪等猛將,成為起飛嘅關鍵,可惜隨住班主維猜空難過身,球隊管理亦出現問題,導致財政陷入困難,結果奪冠7年後就無以為繼,悲情降班。
英超同英冠嘅收入係兩個世界,據英國體育經濟學家Dan Plumley分析,就算英超有「降落傘計劃」保護降班球隊避免破產,喺英超降班亦會即時損失至少6,000萬鎊,包括最大份嘅電視轉播收入、獎金、廣告、紀念品同門票收入等等,其中喺英超同英冠嘅廣告費就相差10倍。
事實上,李斯特城、列斯聯同修咸頓陣中都有唔少出色球星,據報3隊降班後將賣走主力減磅,列斯聯會將班福特、班頓艾朗臣、泰拿阿當斯同韋費特干洛圖賣走,預料套現1億鎊(約9.67億港元);修咸頓亦有禾特普斯、羅美奧拉維亞、貝拿高卓普等受到豪門挖角,老將禾確特亦宣布將會離隊。
至於李斯特城就成為列強吼實重點,英格蘭國腳占士麥迪臣被包括利物浦、阿仙奴在內等勁旅垂青,哈維班尼斯盛傳係紐卡素主要目標,比利時中場泰利文斯亦會以自由身離隊,據報最大機會加盟利物浦,尼迪迪、伊恩拿祖等都有唔少英超球會挖角。