李城童话7年后悲情破灭　降班3队势被肢解

最强博彩盘路过关神器《串绩王》：http://win.on.cc/football/　

22/23球季英超曲终人散，煞科战有人欢喜有人愁，焦点嘅护级战场最终由爱华顿逃出生天，李斯特城、列斯联将陪同修咸顿一齐降落英冠。李斯特城2016年童话式赢英超冠军，7年间急速由盛转衰，据报降班球队即时损失至少6,000万镑(约5.8亿港元)，3支降班队阵中嘅主力球员势必跳船，面临被列强肢解。

李斯特城喺煞科战虽然赢韦斯咸，但唔足够超越同样赢波嘅爱华顿，领队甸恩史密夫赛后表示：“所有人都好失望，我上任后嘅8场波以11分为目标，但最终只得9分，所以我失败咗，但球员已搵番自信。”李斯特城对上一次喺英超降班系2004年，4年之后再跌落英甲。

李斯特城喺2014年升上英超，升班第2季就童话式捧英超冠军，当年佢哋以平价吸纳尼高路简迪、马列斯、占美华迪等猛将，成为起飞嘅关键，可惜随住班主维猜空难过身，球队管理亦出现问题，导致财政陷入困难，结果夺冠7年后就无以为继，悲情降班。

英超同英冠嘅收入系两个世界，据英国体育经济学家Dan Plumley分析，就算英超有“降落伞计划”保护降班球队避免破产，喺英超降班亦会即时损失至少6,000万镑，包括最大份嘅电视转播收入、奖金、广告、纪念品同门票收入等等，其中喺英超同英冠嘅广告费就相差10倍。

事实上，李斯特城、列斯联同修咸顿阵中都有唔少出色球星，据报3队降班后将卖走主力减磅，列斯联会将班福特、班顿艾朗臣、泰拿阿当斯同韦费特干洛图卖走，预料套现1亿镑(约9.67亿港元)；修咸顿亦有禾特普斯、罗美奥拉维亚、贝拿高卓普等受到豪门挖角，老将禾确特亦宣布将会离队。

至于李斯特城就成为列强吼实重点，英格兰国脚占士麦迪臣被包括利物浦、阿仙奴在内等劲旅垂青，哈维班尼斯盛传系纽卡素主要目标，比利时中场泰利文斯亦会以自由身离队，据报最大机会加盟利物浦，尼迪迪、伊恩拿祖等都有唔少英超球会挖角。