意甲前4位置落實　AC米蘭贏祖記搭尾班車

足球博彩神器，每日重心提供盡在《彩報》：http://win.on.cc/football/　

周一(29日)凌晨意甲大戰，AC米蘭作客祖雲達斯，憑老將基奧特一箭定江山贏1比0，成功鎖定聯賽前4位置，下季將會同拿玻里、拉素、國際米蘭一齊出戰歐聯。輸波嘅祖雲達斯目前排第7位，煞科日仍有機會爭取歐霸盃資格。

祖雲達斯因為造假帳案件被扣10分，令歐洲賽形勢大混亂，佢哋今場製造唔少攻門鏡頭，可惜把握力差未能入波，反而喺40分鐘被AC米蘭一次簡單直接傳中，由基奧特頭槌頂入全場唯一入球。AC米蘭教練皮奧利賽後表示：「如果球隊下季想爭意甲冠軍同歐聯，球隊一定要增強實力，要喺呢兩個高水平賽事競爭，我哋需要更多好球員。」

煞科戰焦點會落喺歐霸盃(第5名及第6名)爭逐，目前阿特蘭大(61分)同羅馬(60分)佔據呢兩個席位，而祖雲達斯(59分)仍然有機會後來居上，佢哋依家已至少鎖定歐協聯參賽資格。