曼城先聲奪人　哥迪奧拿奪2項最佳領隊殊榮

足球博彩神器，每日重心提供盡在《彩報》：http://win.on.cc/football/　

曼城今季奪得英超冠軍，並打入歐聯及英足盃決賽，領隊哥迪奧拿居功厥偉，呢位52歲西班牙名帥順理成章橫掃頒獎禮，囊括今季英超最佳領隊，以及由英國聯賽領隊協會頒發嘅年度最佳領隊殊榮，為6月3日晚英足盃決賽對曼聯壯聲勢。

曼城季尾發力反超前阿仙奴奪得英超冠軍，領隊哥迪奧拿亦繼2017/18、2018/19、2020/21年度球季之後，第4次當選英超最佳領隊，絕對實至名歸，史上僅次於11次獲獎嘅曼聯傳奇主帥費格遜。值得一提，曼城前鋒艾寧夏蘭特早前已當選今季英超最佳球員，「藍月亮」將帥威到盡。

至於由英國聯賽領隊協會頒發嘅年度最佳領隊獎項(LMA Manager of the Year)，就更加架勢，因為係由英格蘭各級聯賽球隊嘅主帥投票選出，極具公信力。哥迪奧拿繼2017/18、2020/21年度，第3次獲此殊榮，追平莫耶斯，僅次於5次獲獎嘅費格遜。