拜仁大換血　願意出售班捷文柏華特

最強博彩盤路過關神器《串績王》：http://win.on.cc/football/　

拜仁慕尼黑今季驚濤駭浪之下，奪得德甲冠軍，球會隨即大地震，除咗行政總裁簡尼、體育總監沙歷咸美斯被炒之外，部份球員亦將會離隊，右後衞班捷文柏華特可能最快執包袱，轉投國際米蘭。

班捷文柏華特仍有1年合約在身，但呢位27歲法國國腳無意續約，會方亦願意出售佢，以免明年人財兩失。據悉拜仁開價2,000萬歐元(約1.67億港元)轉會費，國際米蘭有興趣接貨，並已經派人同班捷文柏華特嘅經理人接觸。

班捷文柏華特2019年由史特加轉投拜仁慕尼黑，為呢支班霸上陣162場入12球，其中今季42次披甲入7球，助攻力強。班捷文柏華特亦有份協助法國奪得2018年世界盃冠軍，其中16強對阿根廷，射入世界波，成為贏波英雄。

班捷文柏華特除咗司職右後衞之外，亦可以勝任中堅位置，國米想簽佢，就係希望用呢位「全能戰士」接替將於今夏離隊嘅中堅史堅尼亞。