C朗宣布留效艾納斯　豪言沙特成世界5大聯賽

足球博彩神器，每日重心提供盡在《彩報》：http://win.on.cc/football/　

C朗拿度喺沙特阿拉伯首個球季完結，佢效力嘅艾納斯只排第2位，未能染指聯賽冠軍。有傳C朗將會重返歐洲，傳聞包括加盟紐卡素或者出任皇家馬德里大使，不過C朗日前宣布，佢會繼續留效艾納斯，更指沙特阿拉伯聯賽即將會躋身「世界5大聯賽」之列。

已經38歲嘅C朗表示：「我會繼續留喺呢度，我認為沙特阿拉伯如果繼續發展佢哋未來5年嘅規劃，呢個聯賽將會成為世界5大之一。沙特聯賽好出色同好有競爭性，有好嘅球隊同好嘅沙特球員，或者其他配套好似球證、VAR等都可以做得更好，但我喺度踢得好開心，好想繼續踢落去。」

有傳聯賽冠軍伊蒂哈德即將簽入皇馬前鋒賓施馬，尼高路簡迪、布斯基斯、阿歷斯山齊士等名將都被傳有機會去沙特落班，C朗對此表示：「如果佢哋加盟，我會非常歡迎，因為呢個聯賽將會得到提升，年齡唔係一個問題，最重要係個球員嘅競爭力。」