RB萊比鍚衞冕德盃　尼干古「上車」前發威

最強博彩盤路過關神器《串績王》：http://win.on.cc/football/　

周日(4日)凌晨德國盃王者戰，RB萊比錫憑法國前鋒尼干古1射1傳，2比0擊敗法蘭克福成功衞冕。尼干古去年已經同意今夏轉會車路士，今場係佢喺RB萊比錫最後1戰，用冠軍獎盃作為告別禮物無疑係完美句號。

RB萊比錫今場稍佔上風，不過埋門質素一般，開波4分鐘迪姆華拿就錯失單刀機會，半場兩隊踢成0比0。踢到71分鐘，尼干古左路推入中間起腳，個波省中人改變方向彈入，RB萊比錫憑呢個幸運入球領先；85分鐘尼干古再發威，佢喺4名敵衞包圍下，交畀無人看管嘅蘇保斯拉爾射入，帶領RB萊比錫贏2比0捧盃。

25歲嘅法國前鋒尼干古，上年已經傾掂今夏轉投車路士，今季佢喺各項賽事攻入23球，對於欠缺數胡人物嘅車路士嚟講，尼干古將會係非常關鍵嘅增兵。