皇馬宣布提前解約　賓施馬或赴沙特搵食

最強博彩盤路過關神器《串績王》：http://win.on.cc/football/　

西甲勁旅皇家馬德里周日(4日)宣布，同隊長賓施馬達成協議，提早1年解約，早前有指沙特球隊想招攬呢位老將，佢隨時同舊拍檔C朗喺沙特重逢。現年35歲嘅賓施馬，於2009年從里昂加盟皇馬，共上陣647次入353球，協助「銀河艦隊」奪冠無數，包括5度歐聯封王，佢上年更首次榮膺金球獎，貢獻良多，皇馬亦唔阻佢掘金，昔日賓施馬、C朗同加里夫巴利組成令人聞風喪膽嘅BBC鋒線，而佢係BBC中最後一個離隊，代表一個時代嘅終結。

皇馬官方聲明表示，賓施馬喺「銀河艦隊」生涯一直用能力及保持職業態度，成為球隊榜樣，佢代表住皇馬嘅價值觀，贏得自己決定未來嘅權利，皇馬永遠係佢嘅家，祝願佢同佢家人喺生活新一頁一切順利。

除此之外，皇馬同時亦與夏薩特達成提前解約協議，呢位比利時國腳會喺今個月底回復自由身。據《The Athletic》消息，32歲嘅夏薩特有感自己狀態同傷患問題嚴重，正慎重考慮結束足球生涯。

皇馬同夏薩特嘅合約原本去到2024年夏天，但球會官方聲明表示：「皇馬同夏薩特達成解約協議，佢會喺6月30號回復自由身，夏薩特喺皇馬4個球季贏到8個冠軍，我哋好多謝佢嘅貢獻，祝福夏薩特一家人有美好嘅發展。」

夏薩特喺2019年由車路士加盟皇馬，轉會費接近1億歐元(約8.4億港元)，可惜加盟後明顯適應唔到，而且因傷缺席78場聯賽，今季更加淪為大後備。《The Athletic》消息指，夏薩特收到美職同沙特等球會斟介，但佢覺得自己已經贏過晒可以贏嘅冠軍，加上狀態同傷患問題，好可能會選擇提早收山。