賓施馬煞科戰入波告別皇馬　留下一堆瘋狂數字

足球博彩神器，每日重心提供盡在《彩報》：http://win.on.cc/football/　

周一(5日)凌晨西甲煞科，皇家馬德里主場以1比1逼和畢爾包，賽前已宣布提早1年於今夏解約嘅賓施馬，射入12碼協助「銀河艦隊」扳平，呢位35歲前鋒第18次射入畢爾包大門，打破前隊友C朗攻入呢支巴斯克地區球隊最多入波紀錄，完滿告別西甲。

畢爾包下半場由奧漢辛斯特射入打開紀錄，72分鐘皇馬獲得12碼，賓施馬主射入網，效力「銀河艦隊」14年以來各項賽事354球，屬於皇馬史上入波第2多球員，僅次於C朗，並有165次助攻，同時以238球排西甲歷史射手榜第4位。此外，賓施馬喺歐聯累積入90球，亦係位居第4位，僅次於C朗、美斯、羅拔利雲度夫斯基。

賽後皇馬教練安察洛堤表示，對於賓施馬要求提早解約，感到意外，認為佢仲可以繼續喺高水平賽事征戰。

至於另一位效力皇馬9年嘅球星馬高阿辛斯奧今仗亦上演告別戰，將於今夏自由身離隊，盛傳將會加盟巴黎聖日耳門。