韋格賀斯有得留英超　但唔係踢曼聯

最強博彩盤路過關神器《串績王》：http://win.on.cc/football/　

曼聯已放棄向般尼買斷前鋒韋格賀斯，但呢位30歲荷蘭國腳並唔會重投土耳其球隊比錫達斯，根據英國《太陽報》爆料，護級成功嘅愛華頓將會向般尼收購韋格賀斯，意味佢下季有望倒戈紅魔鬼。

韋格賀斯今季原本被般尼外借去比錫達斯，曼聯為填補C朗離隊後嘅位置，不惜向比錫達斯作出賠償，都要借用韋格賀斯，但呢位高大前鋒上陣31次僅入2球，曼聯決定退貨。

般尼獲得下季英超席位，主帥高柏尼亦無意收回韋格賀斯，令人懷疑佢又被會流放去其他聯賽。愛華頓現時準備出手接貨，皆因「拖肥糖」領隊戴治非常欣賞韋格賀斯，佢執教般尼時期，豪花1,200萬鎊(約1.17億港元)向禾夫斯堡收購韋格賀斯，現時成為愛華頓主帥，希望再同呢位愛將拍住上，兼可以代替經常受傷嘅前鋒卡維特利雲。戴治一向崇尚體力型踢法，相信適合擅長逼搶嘅韋格賀斯發揮。