【官宣】賓施馬簽伊蒂哈德3年：C朗效應！

最強博彩盤路過關神器《串績王》：http://win.on.cc/football/　

法國前鋒賓施馬離開皇家馬德里後，周三(7日)凌晨正式宣布登陸沙特阿拉伯勁旅伊蒂哈德，雙方簽約至2026年。35歲嘅賓施馬坦言今次轉會其中一個原因係「C朗效應」，證明沙特聯賽發展迅速。

賓施馬周三正式拎住伊蒂哈德波衫亮相，合約為期到2026年，賓施馬表示：「伊蒂哈德係一次新挑戰，沙特阿拉伯係一個好聯賽，有好多出色嘅球員，我好朋友C朗已經喺度，佢證明沙特聯賽已經走得好前，我希望喺呢度可以同我喺歐洲一樣咁成功。」

雖然伊蒂哈德未有公布賓施馬嘅合約細節，但據沙特傳媒報道，賓施馬每年人工連同商業收入，可以達到2億歐元(約16.78億港元)。賓施馬將會着伊蒂哈德9號波衫，球會主席表示：「簽入金球獎得主，係沙特聯賽嘅一大里程碑！」