美斯宣布加盟國際邁亞密　解釋拒返巴塞原因

足球博彩神器，每日重心提供盡在《彩報》：http://win.on.cc/football/　

阿根廷球王美斯去向揭盅！美斯周四(8日)宣布已經同國際邁亞密達成協議，將會選擇加盟呢間美職球會。轉會專家Fabrizio Romano形容，呢單交易對國際邁亞密、美斯及美職都係一份巨大嘅合約。

美斯同時接受《世界體育報》、《每日體育報》專訪，解釋佢未有重返巴塞隆拿嘅決定。美斯表示已經尋求任何可能重回巴塞隆拿嘅方案，但可惜未能傾掂數。美斯表示：「經過2年前嘅事(被迫離開巴塞)，我唔想再行番同一條路，將未來交去其他人手上，我想同家人決定自己嘅未來。」雖然亦有傳沙特阿拉伯球會希拉爾出巨額年薪吸引美斯加盟，但未獲呢位阿根廷球王接納。

國際邁亞密班主之一為「萬人迷」碧咸，佢加埋美斯嘅商業效果肯定唔簡單，有報道指，美職商業合作夥伴蘋果公司及adidas亦為合約提供一部分贊助。

美斯接受採訪公布動向後，國際邁亞密隨即發布影片官宣美斯加盟，傳媒報道，美斯簽約3年，年薪5000萬歐元(約4.2億港元)，當中設有離隊條款，美斯有權在每年6月選擇離隊。

美斯空降美職，仲會有好多發展機會，包括得到國際邁亞密球會股份，並獲得美職聯提供特許經營權，同碧咸一樣，當美斯掛靴後，可以在美職成立屬於自己嘅球隊。