名記爆料：莫迪歷考慮去沙特搵食

最強博彩盤路過關神器《串績王》：http://win.on.cc/football/　

繼賓施馬加盟伊蒂哈德之後，另1位皇馬老將莫迪歷亦可能跟隨佢步伐去沙特阿拉伯搵食，根據西班牙著名記者Aaron Dominguez爆料，呢位37歲克羅地亞國腳正在考慮接受沙特球隊吉達艾阿里嘅報價，唔排除今夏自由身轉會。

莫迪歷將於月底約滿，雖然經常傳出佢好可能續約1年，但由於賓施馬突然離隊，轉投伊蒂哈德，莫迪歷亦開始重新考慮去留問題，加上吉達艾阿里盛意拳拳邀請佢加盟，亦令呢位中場球星心動。

事實上，皇馬簽入19歲英格蘭國腳祖迪比寧咸之後，加上原有2位新星曹亞文尼、卡馬雲加，中場線已經完成新舊交接。曾經協助「銀河艦隊」奪冠無數嘅莫迪歷都係時候功成身退，把握球員生涯尾聲去沙特掘金，賺取巨額「退休金」。

值得一提，隨住C朗、賓施馬去沙特搵食，加上美斯轉投國際邁亞密，一旦莫迪歷加盟吉達艾阿里，意味歐洲球壇再冇現役金球獎得主。