史上第一人！艾華利斯單季贏盡世盃+三冠王

最強博彩盤路過關神器《串績王》：http://win.on.cc/football/　

曼城前鋒祖利安艾華利斯今場歐聯決賽並冇上陣，但仍然創下紀錄，成為史上首位單季捧世界盃及球會三冠王嘅球員，強如阿根廷同胞美斯都未曾做到，可以話人生大贏家。

翻查歷史，此前曾有11位球員單季贏得世界盃及歐聯冠軍，包括碧根鮑華等8位前西德名將，其餘3人係法國球員卡林保、華拉尼、巴西左腳王卡路士，但呢位11人都未試過單季贏世界盃及球會三冠王，祖利安艾華利斯今次創出壯舉，成為史上第一人。

年僅23歲嘅祖利安艾華利斯上年世界盃決賽周射入4球，成為阿根廷奪冠功臣，佢今季為曼城各項賽事上陣49場入17球，包括歐聯入3球及2次助攻，「藍月亮」奪冠之路，佢貢獻良多。

不過，呢位射手上年由河床加盟曼城之後，一直屈居艾寧夏蘭特之下，大部份時間擔任後備，曾傳出拜仁慕尼黑有意收購佢，但相信曼城主帥哥迪奧拿絕對唔放走呢位「幸運童子」。