隔13年再入场睇曼城　班主文梳亚好脚头

最强博彩盘路过关神器《串绩王》：http://win.on.cc/football/　

曼城喺欧联决赛击败国际米兰，观众席出现一位“稀客”，就系班主文梳亚，呢位阿联酋阿布扎比王室成员相隔13年，再次亲身入场睇“蓝月亮”比赛，见证球队历史性首夺欧联冠军及成为三冠王，认真好脚头。

2008年9月1日，由文梳亚领导嘅阿布扎比投资基金正式完成收购曼城，开始将呢支长年积弱嘅球队，逐步打造成超级豪门。不过，文梳亚极少露面，首次入场睇曼城比赛系2010年8月，“蓝月亮”该仗主场以3比0大胜利物浦。自此之后，文梳亚冇再捧曼城场，甚至2021年欧联决赛对车路士，佢都冇出席，直至今仗先至现身。

曼城今场欧联决赛对国米之前，已备受睇好可以赢波，成为三冠王，文梳亚亦把握机会去见证历史一刻，网民都大赞佢识拣波睇。

英国传媒分析指曼城可以取得巨大成功，有赖文梳亚“无为而治”，将权力交畀球会专业管理人员及领队哥迪奥拿，令呢位西班牙名帅可以组建最佳阵容。反观，车路士上年易主后，美国班主保利经常干预球队运作，导致成绩一落千丈，同文梳亚形成强烈对比。